![article image](/all-images/img/news16/137521852-anna.jpg)
சித்ரா பௌர்ணமி நாளையொட்டிதான், ஸ்ரீசொக்கநாதர்- ஸ்ரீமீனாட்சி திருக்கல்யாணம் மதுரை மீனாட்சியம்மன் கோயிலில் நடைபெறும். சித்திரைத் திருவிழாவின் ஒரு பகுதியாக கள்ளழகர் வைகை ஆற்றில் இறங்கி மண்டூக மகரிஷிக்கு அருள் செய்யும் வைபவமும் நடைபெறுகிறது. குற்றாலத்திலுள்ள செண்பகாதேவிக்கு சித்ரா பௌர்ணமி அன்று சிறப்பு ஆராதனைகள் நடத்தப்படும். அப்போது சந்தன வாசனையோடு கூடிய மழை பெய்யும் என்பது ஐதீகம்! திருஞானசம்பந்தரால் பாடல்பெற்ற, சித்தர்கள் பலர் வசிப்பதாகக் கூறப்படும் கஞ்சன் மலையில் சித்திரைப் பௌர்ணமியன்று அபிஷேக ஆராதனைகள் சிறப்பாக நடைபெறும். இந்த மலையில் வசிக்கும் சித்தர்கள் மலைக்கோயில் அருகிலுள்ள நீரூற்றிலும், மலைமேலுள்ள சித்தேஸ்வரர் கோயிலுக்கு அருகில் உள்ள தீர்த்தங்களிலும் நீராடி, வான்வழியாக கஞ்ச மலையை நட்சத்திரங்கள் போன்று வலம்வருவதாக ஐதீகம்! இரவு 11 மணியிலிருந்து விடியற்காலை 4 மணி வரை மெதுவாக நகர்ந்துகொண்டே வந்து பின்னர் மறைந்து விடுகிறது இந்த நட்சத்திர ஒளி. சித்திரகுப்தன், சித்திரை மாதம் சித்திரை நட்சத்திர தினத்தன்றுதான் நீலாதேவி மற்றும் கர்ணிகாம்பாளை மணந்ததாகப் புராணம் சொல்கிறது. அன்று சித்ரகுப்தனுக்கு பூஜை செய்வது சிறப்பு. காஞ்சிபுரத்தில் அமைந்து உள்ள சித்ரகுப்தன் கோயிலில் காலையில் மகா அபிஷேகமும், மாலையில் திருமணமும் நடைபெறுகிறது. அன்று இந்திரன் காஞ்சிபுரம் வந்து சித்ரகுப்தனை பூஜிப்பதாக ஐதீகம். சித்ரகுப்தனை தரிசித்தால் கேது உபாதையிலிருந்து நிவாரணம் பெறலாம்! அம்பிகையின் ஆலயங்களில் குளிர்ச்சி செய்வதன் மூலம் அம்பிகையின் சீற்றத்தால் தோன்றும் சின்னம்மை போன்றவை ஏற்படாது என்பது ஐதீகம். அதனால் அம்மன் ஆலயங்களில் குளிர்ச்சி பெரு விழாவாக கொண்டாடப்படுகின்றது. சித்ரா பௌர்ணமியன்று திருவண்ணாமலையை நாம் மட்டுமல்ல, தேவர்களும் சித்தர்களும் ஞானிகளும் சூட்சுமமாக வலம் வருகிறார்கள் என்பது ஐதீகம். ராஜபாளையம்-அயன்கொல்லங் கொண்டான் அங்காள பரமேஸ்வரி ஆலயத்தில் சித்ரா பௌர்ணமியை ஒட்டி நடக்கும் சக்தி பூஜையில் அலகு பூஜை செய்வர். காஞ்சி வரதராஜபெருமாளை பிரம்மதேவன் பூஜிப்பார். பிரம்மன் வரதராஜருக்கு நிவேதிக்கும் பிரசாதம் கமகமவென மணம் வீசுமாம். உண்ட திருப்தியை வரதனின் வதனத்தில் காணலாம் என்கிறார்கள் பட்டர்கள். தேனி மாவட்டத்தை அடுத்து, தமிழக-கேரள எல்லையில், ஐயாயிரம் அடி உயரமான மலைமீது உள்ள மங்கலதேவி கண்ணகி கோயிலில் சித்ரா பௌர்ணமி சிறப்பாகக் கொண்டாடப்படுகிறது. அன்று ஒருநாள் மட்டுமே திறந்திருக்கும். விழுப்புரம் மாவட்டம் உளுந்தூர்பேட்டைக்கு அருகே கூவாகத்தில் அரவான்கள பலி உற்சவம் திருநங்கைகளால் சித்ரா பௌர்ணமி தினத்தன்று கொண்டாடப்படுகிறது. உலகெங்கிலும் இருந்து திருநங்கைகள், இந்நாளில் கூவாகத்தில் ஒன்று கூடுவார்கள்! காஞ்சிபுரத்திற்கு அருகில் ஐயங்கார் குளம் எனும் திருத்தலத்தில் உள்ள சஞ்சீவிராயர் சுவாமி கோயிலையொட்டி நடவாவிக் கிணறு ஒன்று உள்ளது. இந்தக் கிணற்றுக்குள் அழகிய சிற்ப வேலைப்பாடுகள் நிறைந்த 16 கால் மண்டபம் உள்ளது. இந்தப் பெரிய கிணற்றில் சித்ரா பௌர்ணமி அன்று ஒருநாள் மட்டும் உள்ளிருக்கும் நீரை முழுவதுமாக வெளியேற்றி 16 கால் மண்டபத்தில் காஞ்சி வரதராஜப் பெருமாளை எழுந்தருளுவார்! மறுநாள் மாலையில் ராமர், லட்சுமணன், சீதை ஆகியோரையும் அந்த மண்டபத்தில் எழுந்தருளச் செய்வர். இரண்டு நாட்கள் மட்டும் பூமிக்கு அடியில் கிணற்றுக்குள் சுவாமிகளைத் தரிசிக்கலாம். அதன்பின் கிணற்றில் நீர் ஊற்றுப் பெருக்கெடுத்து மண்டபத்தையும் கிணற்றையும் நிரப்பிவிடும். இந்த அபூர்வ காட்சியைத் சுற்றுவட்டாரத்து மக்கள் வந்து தரிசித்து பெருமாளின் திருவருளைப் பெறுகின்றனர். பழங்காலத்தில், சித்ரா பௌர்ணமியன்று ஆற்றங்கரையில் உறல் தோண்டி, அதற்கு திருவுறல் என்று பெயர் சூட்டி, அங்கே இறைவனை வலம் வரச் செய்தார்கள். சித்ரா பௌர்ணமியன்று ஆற்றங்கரைகளுக்கு குடும்பத்தோடு செல்லும் மக்கள், அங்கு உணவு உண்டு மகிழ்வது இன்றும் வழக்கத்தில் உள்ளது. - வி.ராம்ஜி(MyTemple team) 7022638881 குறிப்பு: நீங்கள் தெரிந்து கொண்ட விஷயத்தை உங்கள் நண்பர்களுக்கும் பகிருங்கள் www.aanmeegamalr.com