தத்துவம் ஏப்ரல் 29, 2022

ஒரு மனிதனுக்கு நான்கு மனைவிகள் இருந்தனர்.

அவனின் முதல் மனைவி உண்மையான வாழ்க்கைத் துணையாகத் திகழ்ந்தாள். அவனுடைய வீட்டையும், சொத்தையும், வணிகத்தையும் கவனித்துக் கொண்டாள். அவள் அவனை அதிகமாக நேசித்த போதிலும், அவன் அவளை நேசிக்கவில்லை.

ஒருநாள் அந்த மனிதன் திடீரென்று நோய் வாய்ப்பட்டு படுக்கையில் இருந்தான். அவன் இறக்கப் போவதை அறிந்து கொண்டான். எனவே அவன், தான் அதிகமாக நேசித்த தன் நான்காவது மனைவியை அழைத்து, “நீ என் அருகில் இருந்து என்னைக் கவனித்துக் கொள்வாயா?” என்று கேட்டான். 
அவள் “என்னால் முடியாது” என்று கூறி விட்டுப் போய் விட்டாள். அவள் பதில் அவனை வருத்தியது

கவலையடைந்த அவன் தன் மூன்றாவது மனைவியை அழைத்தான். அதே கேள்வியைக் கேட்டான். 
அவள், “முடியாது. இவ்வுலக வாழ்க்கை எவ்வளவு இன்பமானது, நீங்கள் இறந்த உடன் நான் மறுமணம் செய்து கொள்ளலாமென்று உள்ளேன்." என்றாள். இந்த பதிலைக் கேட்ட அவன் இதயம் கல்லானது.

அதன் பிறகு, அவ்வப்போது பிரச்சனைகளுக்குத் தீர்வு சொல்லும் தன் இரண்டாம் மனைவியை அழைத்து அவளிடமும் அதே கேள்வியைக் கேட்டான். 
அவளோ, “நான் மிகவும் வருந்துகிறேன். இந்த முறை நான் உங்களுக்கு உதவி செய்ய முடியாது. வேண்டும் என்றால் நான் உங்களை நல்ல முறையில் அடக்கம் செய்து விடுகிறேன்” என்று சொல்லிவிட்டுப் போய்விட்டாள். அவளுடைய பதிலும் அவனுக்கு இடி தாக்கியது போலிருந்தது.

அவன் கண்களை மூடினான். அப்பொழுது நான் உங்களுடனே வருவேன், நீங்கள் எங்கே சென்றாலும் நான் உங்களைப் பின்பற்றுவேன் என்று ஒரு சத்தம் கேட்டது. அது யார் என்று பார்க்க விரும்பி, தன்னுடைய  கண்களைத் திறந்து பார்த்த போது, அவனுடைய முதல் மனைவி அங்கு நின்று கொண்டு இருந்தாள். அவள் உணவு குறைபாட்டால் மிகவும் மெலிந்து போயிருந்தாள். அவன் அவளிடம், நான் நன்றாக இருந்த சமயம், நான் உன்னை நன்கு  கவனித்திருக்க வேண்டும். தவறு செய்து விட்டேன் என்று கூறி வருத்தப் பட்டான். 

உண்மையில் இந்த மனிதனைப் போலவே நம் எல்லோருக்கும் நான்கு மனைவிகள் இருக்கிறார்கள் என்பது தெரியுமா?

1. நான்காவது மனைவி என்பது நம்முடைய உடல். 
அது நன்றாக இருக்க வேண்டும் என்பதற்காக அதற்கு எவ்வளவு நேரம் செலவழித்தாலும், நாம் இறக்கும் போது அது நம்மோடு வராது. நம்மை விட்டுச் சென்று விடும்.

2. மூன்றாவது மனைவி என்பது நம்முடைய உடமைகள். 
சொத்து, ஆஸ்தி, வீடு, பதவி போன்றவை ஆகும். நாம் இறந்த பின்பு அவை அனைத்தும் வேறொருவரின் உடமையாகி விடுகிறது.

3. இரண்டாவது மனைவி என்பது நம்முடைய குடும்பமும் மற்றும் நண்பர்களும். 
எவ்வளவுதான் அவர்கள் நம்முடன் நெருக்கமாக இருந்தாலும், அவர்கள் இடுகாடு, கல்லறை / எரியூட்டுமிடம் வரை மட்டுமேதான் நம்முடன் வருவார்கள்.

4. நம்முடைய முதல் மனைவி என்பவள், நம்முடைய ஆன்மா ஆகும். 
பொருள், சொத்து மற்றும் சுக போகத்தை நாடும் பொருட்டு ஆன்மாவை கவனிக்காமல் விட்டு விடுகிறோம். உயிரோடு இருக்கும் போதே தான தர்மம்,பிறருக்கு உதவி செய்தல், கல்வி கற்பித்தல் போன்ற நல்ல செயல்களைச் செய்வதில்லை.
எனவே இறுதி நேரத்தில் புலம்புகிறோம். வாழ்க்கையின் உண்மை அறிவோம். இருக்கும் போதே நல்லவை செய்வோம்.